(×´¯`v^·· · قصــة طويـلة .*. حـب في أقـل مـن 72 ســاعة · ··^v´¯`×)

[جريح القلب..؟]

للكاتب .*. جــــريـــح القلب .*.

حبيت انقل هالقصة وانشالله تنال اعجابكم

البداية
ود.. عمرها 23 سنه متخرجه من سنه من معهد الدراسات الادارية.. بعد تخرجها قدمت اوراقها في بنك ابوظبي التجاري اللي في شارع ابوظبي ..
ود بنت ناعمه وهادية.. جميلة وجمالها من النوع الطفولي عيونها صغار وثمها مرسوم فيها شيء يجذب لما الشخص يتكلم معاها.. تبهره باسلوبها وثقافتها العاليه.. تحب تقرا في كل المواضيع.. كانت مواضيع سياسية او اجتماعية ..عندها خلفية عن ادارة الاعمال بحكم تخصصها ..
يوم طلع قبولها في البنك كانت من اسعد الناس لانها حست انها بدت اول طريق راح تحقق في امنياتها ..كانت تتمنى تسوي شركه تجارية تقدر تاخذ تراخيص من بعض المنتجات المتوفره في بعض الدول.. الخاصه في الملابس النسائية والمكياج وخاصة انها تحب تسافر.. قبل لتدخل المعهد كانت متناقشة مع ابوها في موضوع مست

{ لايمكنك مشاهدة باقي المشاركة لأنك زائر }

عفوا ... نأسف على هذا الازعاج  • لا يمكنك مشاهده باقي المشاركة, هذا قد يكون عائداً لأحد هذه الأسباب:  • انك غير مسجل للدخول بأسم العضوية.  • لم تقم بتسجيل عضويه معنا حتى الآن.  • تسجيل عضوية جديدة - ( اضغط هنــا )  • تسجيل دخول الأعضاء •  اسم العضوية حفظ معلومات الدخول كلمة المرور  • تسجيل عضوية جديدة  • هل نسيت كلمة المرور؟

[جريح القلب..؟]

=======================
كانت ود مرتبه لها جدول معين ..تنش الصبح تتريق مع ابوها وتاخذ اخباره وتطلع بسيارتها تروح البنك.. بعد ماتخلص دوام كانت لازم تمر بيت امها وتقعد مع امها.. وبعدين ترد البيت .. رتبت نفسها على هذا الجدول ...
في يوم الاربعاء طلعت من البيت.. ماشافت ابوها في الصاله كالعاده.. راحت الحوي لقته يالس مع الزراع يعلمه كيف يبا يعيد ترتيب الحديقة ..حبت ابوها على راسه وتمت تتنشده عن الشير ..
( شو ابوي شو ناوي تزرع .. )
( والله ودي ازرع هالبقعه كلها ورد جوري .. والله شو منظر يابنتي .. يرد الروح )
( فديت روحك يابوي ... ابتسامتك بس ترد الروح )
( اصلاً شوفتج يابنتي وانتي مثل الورد تكبيرين جدام عيني تخليني اعيش الحياة وانا مرتاح انه الله عطاني بنت مثلج.. حنونه وحبوبه والكل يمدح اخلاقها ويحبها )
( تربيتك يابوي .. )
( والله انج تسوين عيوني يا ود .. مخبرتيني شو الدوام )
(ماشي .. بعد شهرين بطلع اجازة .. ويالسه اسوي لهم خطه .. نرتب على اساسها اقسام الادارة .. )
( الله يوفقج ..)
( صدق ابوي اليوم يمكن اتاخر في البنك.. عشان المدير مسوي لنا اجتماع.. ويبا ياخذ الافكار الاولية عن مشروعنا في الادارة )
( يابنتي بدون اذن بس زين عشان انا ناوي اروح مع ربيعي بو خلف البحر .. )
( يعني تباني ابات بيت امي )
( اللي يريحج ... سويه )
( خلاص ابوي انا ببات عندها اليوم وبكرى والجمعه قبل صلاة الظهر بكون هني )
( خلاص صار )
بعدها راحت وتلبست كالعادة وشلت شنطتها وطلعت.. في السيارة اتصلت في امها بس امها ماردت عليها.. قالت خلاص انا بتصل بعدين.. فكرت شوي وقالت في نفسها راح تسوي لها مفاجئة.. ارسلت لها مسج وقلت لها انه اليوم ماراح تزورها.. لانها احتمال تتاخر في البنك.. وارسلته على اساس انها بعد ماتتطلع من الشغل.. راح تمر البيت تاخذ ثيابها.. وتسير تبات عندها في اجازة الاسبوع هذا.. المهم في الدوام هي خلصت كل شغلها المطلوب للاجتماع.. وعلى الساعه 1 الظهر طلعت بريك راحت تتغدى مع سونيا .. صديقتها في البنك ..
( شو مبدك تاكلي ايشي )
( لا سونيا مالي نفس تعرفين احس بطني يعورني .. الظاهر هذا كله من عصير البرتقال .. )
( مليون مره التلك ماتشربي حمديات هيدا بيأثر على المعده بس مابتسمعي الكلام .. )
( خلاص انا بسير عيادة الدكتور زهرة بعد ما يخلص الدوام.. تعرفين اللي في العمارة الذهبية في مجمع الدكتور سامي.. تعرفينها .. )
( لا )
( شفتي بنك دبي التجاري.. مب جنبه عمارة ذهيبة.. فوق في الدور ال30 فيه مجمع.. تشتغل فيها الدكتور زهرة ومجموعه من الاطباء .. انا ارتاح لهذي الدكتورة وايد )
( خلاص طمنيني عنك بعد ماتروحي )
(ولا يهمج )
رجعوا الدوام وبالفعل خلص الاجتماع.. ونست تاخذ موعد من الدكتور.. وعلى الساعه 8 في الليل خلص الاجتماع .. وطلعوا الموظفين .. بس يوم يت بتطلع ناداها المدير ..
لو سمحتي يا انسة ود )
( نعم حضرة المدير ...)
( ود انتي من الموظفات اللي يفتخر فيهم البنك .. واتمنى تظلين على نشاطج المتميز دائماً )
( اشكرك استاذ علي وان شاء الله.. الله يقدرني واقدر اخدم بلادي وارد جزء من اللي قدمته لي هالبلاد )
( انا كان عندي بعض الجداول والصراحه متضايق من نتيجتهم ولاني ما اثق الصراحه في بعض الموظفين راح اعطيج الكود.. عشان تراجعينه متى مالقيتي فرصه خلال هذا الاسبوع )
( ان شاء الله ولا يهمك راح اخلصه لك اليوم )
( لايا ود انا مابا اتعبج يكفي انج تميتي للحين )
( لا عادي انا مستأذنه من ابوي على التاخير وساعه ماراح تسوي شيء )
(اللي يريحج .. هذا مفتاح القسم عندي وهذا رقم الكود واذا احتجتي شيء بيكون شفيق خان تحت امرج )
( خلاص انا بحاول ارجع كل شيء واطلع ويوم السبت بعطيك المفاتيح .. )
( ليش بكرى مابتداومين )
( لا لانه عندي موعد الصبح في ابراج الامارات بخصوص مشروع قدمته لهم وانا مرتبه اجازتي تكون بكرى )
( خلاص ياود انا عندي نسخ واقدر اعتمد عليج )
( شكراً استاذ علي .. )

[جريح القلب..؟]

==============================
راحت ود على الساعه 8 وربع القسم وتمت تراجع وماكان حد موجود غيرها في هذا القسم.. حست بالالم في معدتها ..تذكرت انها ما خذت موعد من الدكتوره.. بس هم عندهم طواري هذا اللي تتذكره.. خلصت شغلها وعلى الساعه 9 ونص قفلت القسم وتاكدت من كل شيء.. سلمت القسم حق شفيق خان وطلعت
على شارع ابوظبي كانت مستويه حادثه والمكان زحمه .. حبت تقضي وقت اتصلت في موزه ..
( مراحب هنوده وين ماما )
( مني )
( عطيني اياها حبيبتي )
( هلا موزه ... شو اخبارج واخبار .. جاسم ... )
( والله انا بخير وجاسم مسافر .. كنت بسوي لج تلفون .. لاني بعتذر عن بكرى )
( ليش .. )
( والله امل كلمتني وقالت انه خطيبها عازمها على السينما وانا الوحام متعبني )
( شو ماخبرتيني يا الدبه انج حامل )
( في الشهر الرابع اللحين .. )
( يالظالمه وانا اخر من يعلم )
( والله كنت اتحسبج تعرفين .. شو ماشفتي الكرشه الخميس اللي مضى )
( ايه تعالي وانا اقول هذي بلاها متنت اثرج حامل .. الف الف مبروك خلاص اللحين من تيبين بنت تسمينها ود )
( ولا يهمج فالج طيب ... انا كم ود عندي ... )
( خلاص اتصلب بامل وسوزان وخبريهم اني بتم عند امي ونلتقي الاسبوع اللي عقب .. )
( اوكيه بس بتوحشوني ..)
( حتى انتوا .... خلاص موزه بخليج بروح عند دكتورة زهرة )
( سلامات شو صاير )
( لا بس بطني وايد يعورني ... من اشرب اي شيء حامض يتم يعورني )
( بسم الله عليج لايكون فيج قرحه في المعده )
( والله مادري ... بسير وبشوف )
( خلاص عيل سلامي على عمي )
( ان شاء الله )
سكرت ود ووقفت سيارتها في الباركنات اللي وراء العمارة.. كان فيه مجموعه سيارات موقفين في الفضى.. ولانها ماتبا الزحمه وقفت سيارتها معاهم
دخلت العمارة ..ومالقت اي حد حتى بواب مافيها.. قالت في خاطرها يمكن يكون رايح حق حد فوق او شيء ..كانت العماره هاديه .. لانها كانت يديده ومحد ساكن فيها اللهم بعض العيادات وبعض الشقق اللي حولوها شركات.. العماره وايد عيبتها وخاصة انها يديده فكرت انها بعد ماتروح حق الدكتورة.. تمر على بعض الشقق تشوفهم كيف من داخل يمكن تاخذ شقة حق شركتها وتنفذ مشروعها اللي كانت تحلم فيه ..
دخلت اللفت.. دقت على الرقم 30 وانتظرت.. على الطابق 18 وقف اللفت دخلت معاها حرمه هنديه.. وهم في اللفت سمعت صوت مثل الشي اللي يتكسر.. سالت الهنديه قالت لها عادي لانه العماره يديده فهذا شيء هم متعودين عليه.. بس في الطابق 29 نزلت.. وصلت الطابق 30 ورحت صوب المجمع.. كان فيه كم واحد والممرضه الفلبينية.. راحت قسم انتظار الحريم وقعدت تنتظر دورها.. بعد ما سجلت اسمها كحاله طارئة.. بعد نص ساعه دخلت عند الدكتورة كانت الساعه 10 ونص ..
( هلا دكتوره )
( هلا انسه ود ... شو اخبارك )
( تمام والله يت اباج تكشفين علي ... بطني وايد يعورني )
( اوكي روحي على سرير الكشف )
راحت ود.. ورقدت على السرير وياتها الدكتورة وعاينتها.. قالت لها انها شيء بسيط وتبتعد عن اي شيء حامض وعن المأكولات الحاره.. وعطتها بعض الادويه المضادة وقالت لها تراجعها بعد اسبوع ..
طلعت من العيادة ... كانت تقريباً فاضية ماعدا اثنين او 3 موجودين فيها ..
دخلت الفت وكبست علىG وتمت تنتظر ..يوم وصلت سمعت صراخ اثنين من الهنود.. وهي تمشي لقت البواب وربيعه يالسين يتضاربون.. من اللي راح يسهر على الحراسه.. وحد يقول انا احق والثاني يقول لا امس انته طلعت.. انتظرتهم لين ينتبهون عليها ... في النهاية انتبهوا قالت لهم ودها تشوف وحده من الشقق المعروضه للايجار.. قالوا لها انه الشقة في الطابق ال50 رقم 502 .. والشقة اللي بالطابق 35 رقم 304 مفتوحات وممكن تشوفهم ..
ركبت اللفت وكبست على الرقم 35 ويوم وصلت.. شافت الباب مفتوح دخلت الشقة رقم 304.. كانت عباره عن غرفتين وصاله ومطبخ صغير وفيها حمامين.. عجبتها.. وسكرت الباب وطلعت ..ركبت الفت مره ثانيه وكبست الطابق 50 تبا تشوف الشقة رقم 502 .. وصلت الدور كانت الشقة على اليمين.. وقدامها شركه للملاحه البحريه.. راحت صوب الشقه 502 بعد كانت مفتوحه.. بس هذي كانت اكبر فيها صاله واسعه وثلاث غرف عجبتها اكثر من اللي تحت.. تمت واقفه قراب الساعه.. تحلم شو راح تسوي فيها.. وقعدت تصمم ديكوراتها في بالها وخططت انها راح تعين سوزان صديقتها عشان تمسك لها السكرتاريه وخاصة انها شاطره في هذا المجال لانها للحين مالقت شغل.. وقعدت مع احلامها ..انتبهت على صوت المبايل كان يرن لانه قريب مايفضي.. قالت خلاص.. بطلع وبنزل وبحطه على الجراجه في السيارة.. راحت صوب اللفت ودقت علي .. bush وانتظرت ..تاخر عليها اللفت.. تمت تنتظر كانت تشوف انه يوصل الدور ال 40 ويوقف وبعدين ينزل.. فكرت تنزل من الدري بس المسافة طويله بتتعب وهي بروحها تعبانه ..انتظرت 5 دقايق .. واخيراً وصل

[جريح القلب..؟]

=====================
(((اول ســـ 6ــــت ساعات)))
كان اللفت فاضي.. ركبت ودقت على الدور التحتي وتمت تشوف الارقام.. وقف في الدور ال 30 ركب معاها واحد اسمراني.. لابس كندورة بس مش متسفر ولا متغتر ..قالت في خاطرها شكله من الحلوين اللي يحبون القصات والحركات الشبابية في يده غرشة ماي.. مشروب منها شوي.. وكيس صغير.. صدت الصوب الثاني وتمت تلعب في تلفونها ..وقف اللفت على الدور 25 بس محد كان واقف.. قالت اكيد حد من اليهال يلعب ..وشافت الريال يتأفف.. قالت اكيد عنده شغل بعدين وقف على الدور 20 .. وهي مب مهتمه وايد.. بعدين وقف على الدور عشرة بس ما انفتح الباب ورجع الدور 50.. هني هي خافت ..شو سالفة هذا الفت.. في خاطرها تقول شو هالشركات الزفته ... التفت عليها الريال .. قالها
( لو سمحتي انتي ساكنه هني )
كانت متردده ترد ... بس ( لا انا كنت عند الدكتوره زهرة في المجمع الطبي )
( لا بس مدري شو هاللفت الخايس ..)
كانت نبرته تدل على انه متضيق وراه موعد او شيء
( مدري اللحين تلقى حد بيركب ويانا ويالسين يدقدقون .. )
الفت وصل الدور 45 وقف.. وبعدين نزل مره وحده وقف بين الدور 35و 36 من حركه الفت طاحت ود تحت.. لانها ماكانت منتبه.. اللفت كان واسع شوي ويوسع 12 شخص.. بس بعد يخوف.. هني حست بالخوف وخاصه انه تلفونها.. عطى اشارة سقنل انه فاضى نهائي ..
اعتدلت في الوقفه وفكرت تطلب من الريال معاها انه يتصل باي حد ..
( اخوي اتصل حق الشرطه او اي حد .. يشوف هذا الفت شو فيه )
حط ايده في مخباه.. تذكر انه ما شل المبايل وياه وخلاه في السياره تحت ..ماشل معاه الا البوك وجهاز التنفس ماله اللي مايقدر يستغني عنه .. ومفتاح سيارته ..
( انتي ماعندج تلفون )
( هي بس مفضي ونسيت اجرجه اليوم لاني لهيت في الشغل )
( دقيقة بشوف التلفون مال الطواري .. حاول يفتح العلبة بس كانت وايد مرصوصه .. بس في النهاية فتحها ... )
( هذا مافيه خط .. )
( خلني اجرب )
عطاها السماعه حاولت.. بس بدون فايده.. كانت الساعه .. 11ونص .. يلست تدعي الله انه يفج ازمتهم ... حاولت تفج التلفون ترسل مسج بس كل ماترسل يتسكر.. طلعت اوراق الدكتوره اللي عطتها اياهم عشان الاكل الصحي من شنطتها عشان تلهي عمرها ..على بال ماينتبهون انه اللفت واقف.. او اي حد يطلب اللفت.. قعدت على الارض .. مسكت الاوراق قالت بيلس اقراهم ..
( والله انج متفيجه )
صدت صوبه مستنكره الكلمه اللي قالها ...
( ليش )
( اللحين حنا عالقين هني وانتي يالسه تقرين هالاوراق .. )
( شو تباني اسوي اصارخ يعني ... احنا في الدور 35 يعني ما اضن حد يسمعنا ... ولا حد بيعبرنا الا اذا حد يبا اللفت ... )
( والحل في اعتقادج )
( ننتظر الله يرحمنا ويرسلنا حد )
( بس انا ماروم انتظر اكثر )
( ليش ... ما انا يالسه هني )
( طيارتي الساعه 12 ونص )
( خلاص ان شاء الله بيون وبيفتحون اللفت قبل لاتطير عنك الطيارة بس انته ادعي ربك )
رجعت تقراء الاوراق.. حست بالم قوي في بطنها.. تذكرت انها ماكلت اي شيء.. بس قالت لابد ماينتبهون . خلصت الاوراق كانت الساعه 12 وربع.. كان الريال يالس يروح ويي طول الوقت وكل شوي يحاول في تلفون الطواري.. احيانا كان يضرب الازرار يمكن يتحرك اللفت بس هو كان واقف مكانه ..
( مابقى شيء على الطيارة ... )
( خلاص اكيد بيلغون رحلتم وبكرى سافر )
( لازم الليلة ... ابوي بيسوي عملية قسطرة في لندن )
( اه .. الله يشفيه )
( امين .. )
طلعت تلفونها حاولت مره ثاني ..يمكن تقدر تسوي شيء فيه.. بس ماكان فيه اي فايده.. سندت راسها على طرف وغمضت عيونها ..
( شو ناويه ترقدين )
( لا بس شو اسوي .. تعبانه واحس بطني وايد يعورني .... وماكلت شيء من الصبح )
( عندي اسنكرز تبين )
( ما احب السنكرز )
( شو تحبين عيال .. )
( امممم احب مارس ... والجلاكسي )
اشوفه قعد عند باب اللفت وتسند ... رجع سالني
( ممكن اعرف اسمج )
( ود .. وانت )
( ثابت )
(عشات الاسامي .... )
( شو كنتي تسوين عند الدكتورة ... )
( بطني يعورني شوي )
( حامل ... )
( لا انا مب متزوجه بس ربيعتي تعتقد انه بي قرحه لاني اشتكي دوم من اشرب شيء حامض )
( تصدقين عندي ربيعي جذيه من ياكل شيء حار او حامض وايد يتعب )
( ايه بس طمنتني الدكتورة قالت لي انه مافيني شيء )
( الحمدلله )
( شرايك نلعب .... )
بطل عيونه فيها مستغرب من كلامها.. في خاطره يقول شو هذي ماتحس الحين وقت الواحد يلعب.. والله ماعندها سالفة
( والله متفيجه )
( شو تباني اسوي .. اتم اصيح )

احسن عشان احس انج بنت )
( ليش جدامك ريال )
( لا بس احيد الحريم.. من يتعرضون لهمواقف يتمون يصيحون.. ويسون بلاوي ويزيدون همك هم ... بس انتي غير )
( ايه بس انا ما اخاف .. لاني مؤمنه انه الله مايترك عبده في ضيقه.. وبعدين شو اخس عن الموت ... اذا بنموت هذي ساعتنا )
( موتي روحج )
( حتى انته بتموت لو الله كاتب )
( ايه بس مب اللحين )
( شوف هذا شو يقول انته .. هي هذا مكتوب علينا .. مب بكيفك )
( اوكي صخي خلاص مابا اسمع محاضرات )
( كيفك .. بس لا تكلمني )
( عاد انا بموت واكلمج )
( فكنا واللي يخليك .. )
صدت عنه وقعدت تلعب في شنطتها.. لقت قلم وبعض الاوراق .. ولقت حلاوه بطلت حبه وخذتها .. مدت يدها
( تفضل)
( مابا مشكور )
( على راحتك )
( اللهم طولك ياروح .. معقوله محد درى عنا للحين ... )
( والله مدري تعال نحاول نفتح اللفت .. من فوق )
( شو قالولج جمس بوند جدامج )
( لا بس كل الافلام الامريكيه جذيه يسون )
( شو تحبين تشوفين افلام )
( الصراحه احب اسير بس تعجبني الافلام الهادفة )
( ايه اللي يبطلون فيها الفتات من فوق )
( اوووه مايسوى اقترحت عليك ... )
( لابس كلامج يقهر الصراحه .... ماتشوفين انه مافي مكان اقدر اركب واولص للصقف ... )
( تصدق مانتبهت ... )
( ايه عاد انا انتبهت ... ولو كان فيه كنت من زمان حاولت عشان افتك واسفر )
مرت ساعتين.. ومحد انتبه على وجودنا ابد.. ود قلبها بدى يدق.. بدت تخاف معقوله الساعه 2ونص ولحد الحين محد سال عنهم .
( ثابت انته متزوج )
( لا ... )
( شو تشتغل )
( ماشيء انا عندي شركه مقاولات ... )
( والله ... شو حلو الشغل.. وكيف تدير الشركه وكم موظف عندك ؟؟ )
كانت متحمسه بجد لانها حست انه ممكن تستفيد من خبرته ...
( طاع هذي .. والله اشك انج بنت طبيعية )
( ليش )
( الحين يالسه تساليني عن الشركات .. والله اول مره في حياتي اشوف حرمه مثلج عجيب ... )
( ليش يعني انا دارسه ادارة .. واعرف في هذي الامور )
( وعلى هذا تشتغلين )
( ايه في البنك )
( وش وظيفتج اكيد في الرسبشن .. متعودين يحطون البنات الحلوات هناك عشان يسون جذب حق الناس )
( هي انت شو تحسبني.. بنت شوارع ... انا اشتغل مديرة العلاقات العامه ... )
بطل عينه مستغرب من كلامها..
( مستحيل .. انا ماعطيج الا20 سنه ومديرة ... اكيد شغل واسطات هذا )
( اي واسطه اي خرابيط لا انا الحمدلله خلال فترة بسيطه قدرت اثبت كفائتي.. ومديري يثق فيني ..وعيني مؤقت بدل مستر ثميث اللي طلع اجازة )
( مؤقت ... اه جذيه .. يعني مديرة مؤقته )
( شو فيها ... احسن منك )
( هاااااي ليش ان شاء الله ... شو شايفتني ... موظف شراتج )
( لا رجل اعمال فاشل )
سكت عنها وابتسم ... سند راسه للباب .. وماعلق ابد ...
شافت الساعه كانت يايه على الاربع.. يالله معقوله محد لين اللحين سال فيهم.. مب معقوله وين اهلهم.. تذكرت انه ابوها مب في البيت ويعتقد انها عند امها.. وهي قالت حق امها انها مابتروح.. حست بغصة يعني ولا حد يدري هي وين.. صدت على صوب.. نزلت دمعه غصبن عنها .. هذا موقف تنحط فيه .. شو بيصير عليها اللحين ..
( ود بلاج .. ضايقتج بكلامي ... )
( لا مافيني شيء ... )
( انزين كنتي تقولين تعال نلعب .. شو تبين تلعبني .. )
( كنت بلعب معاك مشنقة .. )
ضحك علي ... وقال
( يالله عندج اوراق .. )
( ايه )
وطلعت القلم وجلبت اوراق الدكتورة وسوت مشنقة .... وبديو يلعبون ..
كانت تسوي المشنقة ..وتشنقة قبل لايخلص وكان ينقهر منها.. وتمت على هذا الحال لين سمعوا صوت في اللفت.. ضحكوا من الفرحه ماكانوا مصدقين.. معقوله حد انتبه عليهم.. يلسوا يصارخون ويدقدقون اللفت عشان يعرفون هم اي دور بس بعد شوي ماكان فيه اي صوت.. ورجع المكان هادي ..
( يمكن يحاولون يصلحونه )
( يمكن ... )
( احس بعطش ... )
( اندوج ... هذي دبت الما ..)
( مشكور )
شربت شوي ... ورجعتها له ..
( ود شربيها انا ماباها ... )
( لا بس خلاص شبعت )
( شو انتي دوم جذيه ... )
(لا بس انا والما مب إصلاح )
( مب زين لازم تشربين ماء وايد ... عشان البشرة والجفاف )
( سمعوا من يتكلم ... )
( لا والله اتكلم جد ود.. انا اذا ماشربت ماء احس انه جسمي كله يجف عشان جذيه دبت الماء دوم معاي .. )
( صدق ثابت شو كنت تسوي عند الدكتور فوق ... )
( احس هاليومين صدري وايد يضيق علي بالذات يوم ارقد.. اختنق .. شو اسوي فيني ربوا من يوم صغير )
( اه ... عشان جذيه جهاز تنفس وياك )
( ايه.. تعرفين الانسان لازم يخاف على صحته ..بس قالي الدكتور انه احتمال يروح عنك.. وخاصة انه صاير لي وانا صغير )
( ان شاء الله ... )
كانت الساعه 6 الصبح .... حست ود بالنوم .. بس المكان .. اللي هم فيه مستحيل يخليها ترقد ..

[ma@i@]

ممكن المره الجايه تكبر خطك بس شوي علشان أعرف أقرأ:D
بس مشكور ع القصه

[جريح القلب..؟]

============================
((ثاني ســـ 6 ـــت ساعات))
*خارج نطاق اللفت *
ام ود كانت تتصل بود على الساعه 11 ولقت التلفون يعطيها مغلق.. حاولت مرتين بس بدون فايد .. قررت انها الصبح على الساعه 8 راح تتصل فيها وتشوف ليش مامرت عليها مثل كل يوم
اما بو ود كان في رحله مع ربيعه ..ومطمن على انه ود راحت عند امها.. واتصل فيها على الساعه 12 .. بس لقى تلفونها مغلق.. قال اكيد شافت امها ولهت معاها.. الحريم ماتخلص سوالفهم.. وقرر يوم يرد العصر يمر بيت سيف عشان يشوف ود لانه كان متوله على بنته ..
في العماره ..بعد تضاربو السكيورتيين.. قرروا انه كل واحد يسوي اللي على هواه.. وكل واحد منهم عطى نفسه اجازة.. واحد راح رقد والثاني طلع صوب ربيعه في العماره الثانية .
اما السكان.. فكانت الساعه 1 يوم انتبه شخص انه اللفت متعطل.. وماسمع صوت ..قال اكيد محد فيه ولانه ساكن في الدور .. الخامس .. ماهتم ونزل على الدري ..
وفي شخص ثاني.. كان عنده مناوبه في المجمع.. حاول مع اللفت عشان كان يبا يروح يشتري له علبة سجاير ويوم لقى انه اللفت متعطل .. رجع داخل واتصل في السكيورتي.. وترك له رساله يبلغه فيها انه اللفت متعطل ..
((ثاني ســـ 6 ـــت ساعات ((
تعبت ود من الانتظار وكانت نعسانه وودها ترقد بس مستحيل النوم ييها وهذا وضعها.. تسندت على زاويه في اللفت.. حاولت تغفي شوي بس بدون أي نتيجه.. لانه أي حركه كان يسويها ثابت كانت تخليها تفتح عينها وخاصة انه يتحرك ويروح ويي ويجرب التلفون ... بدون أي نتيجه ..
( شو بترقدين )
( فيني رقاد .. ناشه من الساعه 6 .. )
( رقدي .. واذا صار شيء بوعيج )
( مايني نوم وبعدين انته رايح ياي .. كيف برقد وانته ماتهدى شوي )
( كيف اهدى.. تعرفين الحين عملية ابوي بعد ساعه.. احس اني ميت قهر.. واهلي كلهم مسافرين ومحد في البيت.. يعني محد بيسائل عني )
( شو خايف ... )
( لا مستانس وبطير من الفرحه اني انحبست في لفت من 7 ساعات مع وحده ... )
( لا وتتطنز بعد .. شو يعني انا اللي حبستك .. والله العظيم تقهر )
( لا بس اسئلتج تافه وبايخه )
( اسم الله عليك انته اللي سوالفك تونس عاد )
( انتي بتسكتين ولا )
( شو بتضربني قصورك ... شو مرتك وانا مادري )
( اللهم طولك ياروح ذبحتيني تراج .. الله يعين اللي بتاخذينه)
( فديت ريلي .. اصلاً هو بياخذني لاني جذيه )
( بنشوف .... )
( ههههااااااي )
( ماقلت شيء يضحك )
( لا قلت .. اللحين اللي يسمعك يقول بعرفك عقب مانطلع .. اصلاً انا من صوب وانته من صوب ... )
( اسمعي بس سكتي .. تراج اذيه وانا مب متحمل خرابيطج وطوله لسانج )
( اوف منك .... )
قعد ثابت على الارض وتم ساكت ... كان شكله تعبان ومرهق ..
( ثابت بك شيء)
( لا )
( لا صدق فيك شيء )
( قلت لج لا .. بس سكتي خليني ابا ارقد شوي )
سكتت ود عنه.. حاول يرقد بس كانت رقدته مب مريحه لانه طويل.. ومستحيل اللفت يكفيه.. عطته ود شنطتها عشان يحطها تحت راسه يمكن يرقد.. خذها وحطها تحت راسه.. شوي وسمعت ود شخيره تمت تضحك عليه خافت انه تنششه.. يوم رقد ثابت كانت الساعه سبع وربع.. غمضت ود عيونها يمكن تقدر ترقد شوي ..خاصة انه الحين النهار طلع واكيد الكل بيحتاج اللفت.. ولابد مايطلعونهم منه ..هانت كلها ساعه او اقل ويسمعون حركة الناس.. حاولت ترقد وتذكرت انه الساعه 8 هي مرتبطه بموعد في ابراج الامارات عشان تناقش مشروعها.. فكرت كيف بتجابلهم وهي جذيه تعبانه قالت في نفسها خلاص هي مابتروح وبتتصل فيهم اول ماتركب السيارة وبتروح ترقد عند امها ..
*خارج نطاق اللفت *
ام ود ردت اتصلت كانت تدري انه ود عندها موعد.. بس لقت تلفونها مغلق.. حست بخوف على بنتها.. معقوله ماتتصل فيها ولا تسال طلعت برع غرفتها.. طلبت من البشكارة تنادي لها الدريول لانها بتطلع ..وهي طالعه شافت اخوها سيف .
( وين سايرة فاطمه من الصبح )
( ماشيء بسير اشوف ود في البيت )
( ليش شو صاير .. عسى ماشر ود فيها شيء ؟؟! )
( اتصل فيها من امس وتلفونها مغلق )
( يمكن طالعه مع ابوها اتصلتي في حميد .. )
( هي وتلفونه هو بعد مغلق )
( اتصلتي البيت عندهم .. )
( لا )
( اتصلي ... وشوفيهم يمكن مب منتبهين على تلفوناتهم .. )
اتصلت ام ود وبعد محد رد عليها ... قلبها انقبض ..
( لا الوضع مايطمن يا سيف لايكون طب عليهم حرامي ولا شيء انا لازم اسير )
( الله يهديج .. شو حرامي ماحرامي ... تلقين حميد يالس عند زراعته وبنتج عنده برع )
( .. على العموم انا بسير اطمن بنفسي على بنتي )
وطلعت امها من بيت اخوها اللي كانت عايشه فيه.. وخاصه انه هو الكبير بعد ماتوفى ابوه ..
راحت صوب بيت طليقها ويوم وصلت نزلت دقت الجرس.. ماكان حد موجود شوي الا تسمع صوت الزراع فتح لها الباب.. دخلت البيت.. وراحت الصاله كان البيت فاضي محد فيه.. سالت الزراع عن حميد قالها محد.. سالته عن ود بعد قالها محد.. نادت البشكارة سالتها عنهم قالت نفس الكلام ... قالت اكيد رايحين مكان.. بس وين بيكونون ... طلعت ورجعت بيتها ..
في البحر.. بو ود حس بصدره مقبوض.. راح صوب تلفونه افتحه.. اتصل في ود لقى تلفونها مغلق ..اتصل في تلفون بيت سيف محد رد .. ماكان حافظ تلفون طليقته.. نش وسار حق ربيعه وقاله انه يبا يرد.. لانه خايف على بنته ..
* داخل اللفت *
على الساعه 9 كانت ود تسمع صوت شخير ثابت.. تقول في خاطرها هذا في قعدته مزعج وفي رقاده مزعج.. اووف شو هالبلاه.. كانت مغمضه عينها يوم سمعت صوت غريب.. وصوت شخير ثابت راح فتحت عينها لقت ثابت مختنق.. وشكله مخضر كانه حد زاقدنه .. فاتح عينه وصايرات حمر يحاول يتنفس مب قادر.. نشت صوبه حاولت تكلمه بس بدون فايده.. تمت تضربه وتصارخ فيه بدون أي نتيجه كان شكله يخوف .. عيونه طالعات على برع ويدمعن.. ويزبد ومب عارفه شو تسوي تمت تصارخ فيه ..
قامت تدور في كندورته لقت جهاز التنفس.. عدلت وعطته جرعه.. لقت وضعه تحسن عطته جرعه ثانيه تم يكح.. يوم سمعت كحته تمت تصيح.. كان شكله وايد مرهق.. حطت راسه في حضنها وتمت تطالعه.. مب عارف شو تسوي فيه تحس انها مسؤوله عنه ..كأنه ياهل خافت عليه.. شافت وضعهم تمت تصيح زياده.. حاولت تننششه وتشربه ماي.. فتح عينه شرب ماي ورجع رقد.. خافت اكثر كل شوي تقومه كانت تبى تتطمن عليه.. بعد ساعه صحصح نش وكان يشوفها متعجب ..
( وين نحن )
( بعدنا في اللفت )
( تصدقين كنت اعتقد اني مت .. بس تدرين .. مشكورة ... لو مب وجودج .. مدري شو كان بيصير ... )
( كنت بتموت .. )
تمت ود تصيح من خاطرها .. ثابت مب عارف شو يسوي ..
( ود ارجوج سكتي قطعتي قلبي.. اسمعي اكيد الحين بينتبهون ..خاصه انه كل الشركات يبدون دوام.. ولابد مافي مراجعين.. والعيادات بتفتح )
حاولت تسكت ومشت دموعها .. تم ثابت يطالعها
( اللحين انتي مسويه نفسج جونكر .. اخر شيء ظهرتي جي )
( شو جي.. والله ماشفت شكلك تقول واحد زاقدنك.. شو تباني اسوي واحنا في اللفت اللي مب طايع يتحرك.. تخيل لو ماكنت يايب جهاز التنفس مالك ..)
( بس يبته وانتهى الموضوع )
( ايه شو عليك ... انته تمرض وانا ابتلش بك ... )
تم يضحك ..
( شو فيك تضحك ماقلت نكته )
( لا بس تذكرت مقطع لاغنية حق كاظم الساهر .. نفس معنى كلامج .. )
( شو هي )
وتم يغني.. وين اخذك.. وين انهزم بيك.. بضلوعي لو بعيوني اخليك.. جابتك وتبسمت امك.. وانا على راسي شلت همك.. هي اللي عليها سمت اسمك .. وانا اللي عليا ابتلي بيك .. ويردد المقطع ويضحك ..
كان صوته وايد حلو ... عجب ود اللي قالت له
( اقول ليش ماتغني صوتك وايد حلو .. )
( شو اغني تبين ابوي يروح فيها .... )
( ليش يعني )
( انا اكبر اخواني ومرشح اني امسك شركات ابوي وجميع اعماله ... وخاصه انه ... تعبان مثل ماقلت لج )
( زين وش يخص هذا بهذا )
( شو غبية انتي ماتفهمين .... كيف تبيني اغني واهلي كلهم ناس معروفين في البلاد ... )
( اه .. انزين ... اللحين شو نسوي في هالمصيبة ... )
( خلاص هانت .... صبرنا طول الليل تعتقدين محد بينتبه اللحين ... )
( ان شاء الله )
في هاللحظه سمعنا صوت قوي.. كان في حد بالفعل يسوي شي بس مب عارفين وين.. شوي نسمع حد يحاول يفتح الباب.. كان ثابت يساعدهم ... لين فتحوا الباب .. كانوا شرطه ومعاهم كم شخص ..
( انتوا بخير )
( ايه بخير حضرة الضابط بس ياريت تطلعونا بسرعه ..)
( كم واحد انتوا )
( احنا اثنين انا ومعاي بنت ..)
ـ0 من متى وانتوا هني )
( من الساعه 11 في الليل .. )
( شو اسمك ... )
( ثابت .... )
( اخوي ثابت ..اللفت حباله كلها متقطعه.. هذا كلام الاختصاصي.. ولازم تلتزمون الهدوء لانه أي حركه ممكن تسبب كارثه.. احنا بنحاول نطلعكم بس محتاجين وقت ..اسمع اخ ثابت .. تحسبن لاي شيء خذ هذا الاكل والماء وخلوه عندكم .. )
( ان شاء الله بس ماتقدرون تطلعون البنت اللي معاي ... )
( بنحاول نطلعها وبعدين نطلعك )
نادى الضابط على اثنين عشان يساعدون يفجون باب اللفت اكثر .. كانت الفتحه صغيره .. بس كان ممكن تطلع ود منها ...
( تعالي برفعج عشان يسحبونج هم )
( مابا اول خل يطلعونك )
( شو تقولين انتي ماسمعتي الضابط .. شو يقول ... في خطر على حياتنا )
( وفي خطر على حياتك اكثر ومع ذلك مابا يا اطلع وياك يا اتم وياك )
( اسمعي الكلام يا ود .. لا استعمل معاج القوة .. )
( ماتروم ... )

[جريح القلب..؟]

حاول يمسكها ثابت عشان يرفعها ويسحبونها الشرطه.. بس صراخ ود وعصبيتها ومقاومتها لثابت خلت اللفت يهتز ويغير من وضعه اللي نزل لين الدور العاشر وتم متعلق ..
( اللهم طولك ياروح شو هالحركات.. لو سامعه الكلام كان اللحين انتي برع) وكان شكله صدق معصب عليها .. وده يذبحها
( قلت لك مابا .. شو انته رقدت شوي بغيت تموت ... كيف اخليك ... )
( ود اسمعي الرمسه.. الحين بيحاولون يطلعونه ارجوج طلعي ولا تسوين جذيه.. انتي اكيد بنت ناس واللحين تلقين هلج يانين .. )
( ما اضن اول شيء ابوي مب في البيت.. ورايح رحله ويتحسب اني عند امي.. وامي انا ارسلت لها مسج امس ..قلت لها اني مابرقد عندها لاني كنت بسوي لها مفاجئة.. بس التاخير في دوامي والدكتورة نسوني اتصل فيها ... وعلى ماتشوف )
( ليش امج في بيت وابوج في بيت )
( ايه هم منفصلين من 18 سنه ... من كان عمري 5 سنوات ... )
سمعوا اصوات ناس ... وحد يحاول يفتح الباب .... بس بدون فايده ... حاول الضابط انه يكلمهم ..
( اخ ثابت انته هني ... انتوا بخير ... )
( ايه بخير .. شو صاير ... )
( السستم الخاص بالفت مب مخلي الابواب تتبطل.. وارسلنا لخبيرنا عشان يحضر ويشوف المشكله عشان نفتح لكم الباب.. تبون شيء .. نبلغ أي حد شيء .. )
( ود ممكن تعطيني رقم ابوج او امج عشان يتطمنون عليج )
عطته رقم بيتهم.. نست انه ابوها مب موجود وعطى ثابت الرقم للشرطه.. وطلب منهم الضابط انهم مايتحركون عشان .. اللفت ما يغير مكانه او ينقطع الحبل .. فيصير شيء هم مايتمنونه ...
* خارج نطاق اللفت *
اتصلت ام ود في ود للمره المليون ماكان أي حد يرد .. رجعت اتصلت في حميد ... ورن تلفونه اخيراً
( الو هلا حميد )
( مرحبا فاطمة .... شخبارج .. شو مغلقين تلفوناتكم انتي وبنتج .. هميتوني )
( ليش هي مب معاك )
( من .. ود لا امس استئذنت انها بتبات عندج )
( شو .. لامرت على ولا اتصلت .... )
وين راحت يمكن البنت تعبانه في البيت .... انا بوصل البيت وبرد خبر )
( انا كنت في البيت ومالقيت حد منكم هناك قلت اكيد طالعين ... )
( لا انا من امس طلعت مع ربيعي صوب البحر واتفقنا انا وود انها هي تبات عندج لين يوم الجمعه.. لا الموضوع مايسكت عنه انا ياي صوبكم اللحين )
سكرت ام ود اللي حست الدنيا تدور فيها ..معقوله بنتها صار فيها شيء.. لايكون سوت حادث ولا حد تعرض لها.. تمت تصيح وهي قلبها متقطع على بنتها ... وحيدتها

[جريح القلب..؟]

===========================
))ثالث ســ 6 ــت ساعات ((
كانت ود قاعده .. حست بطنها يعورها .. تذكرت انه ماكلت شيء .. خذت الكيس اللي عطاهم اياه الظابط ..
( ثابت ماتبا تاكل شيء )
( شو في الكيس)
( سندويشات وعلب عصير وماء )
قعد ثابت مقابلها ..
( سندويشات شو .. )
فتحت ود الكيس ويلست تبطل النسدويشات كانوا كلهم سندويشات جبن ماعدا واحد فلافل ..
( تبا الفلافل او جبن ... )
( فلافل .. )
كان ود خطارها فيه بس قالت بعطيه.. مش مهم يوم بطلع بمر اشتري لي فلافل ..طلعت الجبن اللي كانت هي اصلاً ماتحبه بس من اليوع شو تسوي .. بطلت السندويج وتمت تشل منه قطع الجبن وثابت يراقبها .
( شو تسوين .. ليش ذي تلعبين بنعمة الله)
(ما اكل جبن ومافي الا جبن ... وميته يوع . شو تباني اسوي ... )
( اندوج الفلافل وانا بكل الجبن .. ولو اني ماحبه مثلج )
تمت ود تطالعه وهي متشمته فيه .
( توك تعطيني محاضرات .. خلاص اسمع انته كل الفلافل وانا بشل الجبن وبكل سندويشجي )
قسم ثابت السندويش .. وعطى ود نصه
( اسمعي على قوله اخوانا المصريين خلي بينا عيش وملح )
ضحكت ود وشلت نص السندويج من يده.. وبطات لهم عصيرين ويسلو يشربون.. وبعدين قسم السندويج اللي شلت منه الجبن وعت نصه ثابت اللي كان ميت من اليوع مثلها واكثر.. شوي وسمعوا .. الظابط يكلمهم ..
( اخ ثابت انتوا بخير .. )
( هيه .. شو صار وين الخبير مالكم شو سوى .. )
( الصراحه شو اقولك ... الظاهر انكم بتمون بعد ساعه قبل لا نقدر نفتحه .. )
التفت ثابت على ود...
( يعني صبرنا طول الليل يات على ساعه )
( المهم نطلع ... )
( صدقتي .. تعالي البنك شو بيسون اليوم انتي حضرة مديرة العلاقات العامه مب موجوده يمكن يوقفون الشغل )
ود وهي تطالع ثابت ومطنشه كلامه ..
( عندي اجازة اليوم كان المفروض اروح الساعه ثمان صوب ابراج الامارات .. )
( ليش شو عندج هناك )
( عندي موعد في الشركه عن المشروع التجاري مالي اللي ناويه اسويه )
( طاع هذي والله صدقها ناويه تسوي شركات)
( ليش ان شاء الله في شو اقل عنك .. ولا يعني انته عشان ريال وانا بنت مايصير )
( روحج قلتيها مايبت شيء من عندي )
( اقولك ..واللي يرحم والديك .. اسكت .. مابا اسمع كلامك اللي كله تحيز للريايل .. والله اغلبيتكم فاشلين .. شراتك )
ابتسم ثابت وبعد ماعلق عليها.. لانه ثابت كان رجل اعمال ناجح.. ويعتبر اصغر رجل اعمال لانه عمره كان 25 سنه وكان يملك شركه مقاولات معروفة سواها روحه بدون مساعدة ابوه.. وماكان يحب يثبت لود اي شيء عشان جذيه سكت عنها وماعلق ...
(اوكيه شو بتسوين اللحين اكيد بيقولون عنج مب ملتزمه )
( عادي بخذ ورقه من الشرطه عشان اثبت الشيء اللي تعرضت له واطلب موعد ثاني منهم )
كان ثابت من داخله معجب بود.. ويحس انه بالفعل جدام انسانه شخصيتها قويه ..وغير عن اي انسان قابلها في حياته.. من بدت ازمتهم وهي ما حسسته بالخوف لا منه ولا من الوضع اللي هم فيه بالعكس كانت تحاول تخفف التوتر.. وغير انها يوم شافت حالته .. قدرت انها تساعده وماتركته يموت.. كان يقول في نفسه مدري لو صارت لي الحادثه مع بنت جبانه جان ذبحتها من كثر الزعيق والصراخ.. ورجع يبتسم
( شوبلاك ... تذكرت شيء )
( لا بس كنت افكر فيج .. )
( فيني .. ليش شو بلاني )
( لا بس احس انج غير عن البنات . يعني قويه )
( شو قصدك .. ممكن توضح .. )
في اللحظة سمعوا صوت الظابط يحاولون يفتحون الباب اللفت.. اللي كان ينزل شوي شوي ووصل جزء كبير منه تحت.. بس افضل من قبل لانه بامكان ثابت يطلع ..بطلوا الشرطه الباب.. وطلب الضابط من ثابت انه يطلع البنت اللي معاه.. شوي شوي ..ود خافت تسوي شيء وسمعت كلام ثابت اللي قدر انه يرفعها وسحبوها الشرطه .. ويوم حاولوا يطلعون ثابت تحرك اللفت شوي.. بس حاولو لكن اللفت كان اسرع قدر ثابت انه يخلص نفسه بس رجع داخل اللفت اللي انقطع حبه ونزل مره وحده تحت ..
( حضرة الضابط شو صار ... شو صار علمني )
( مدري يا انسه.. اعتقد الحبل انقطع بس ارجوج تمالكي نفسج بنحاول نطلع الاخ ثابت.. كان في هذي الاثناء الشرطه واصلين تحت ... وقدروا يفتحون الباب بصعوبه ... لكن لقوا ثابت طايح والدم ينزف من خشمه وحلجه ..
كان في اسعاف ينتظرهم برع تحسباً لاي مشكلة وركبوه فيه بعد ماحطوه على النقاله ..
( انسه ممكن تروحين معانا القسم عشان نخلص المحضر.. وتقدمين شكوى على الاهمال اللي كان صاير في هذي العمارة )
( مب اللحين لو سمحت حضرة الضابط انا بسير مع ثابت .. )
( ليش يقرب لج شيء )
سكتت ود قبل لاترد .. وكانت متردده قبل لاتقول
( ايه خطيبي ويوم تعرضنا للحادث ... كان يايبني يراويني الشقة اللي كنا بنسكن فيها بعد العرس ب .. )
سكتت ود وماعرفت كيف تكمل جذبها وركضت صوب سياره الاسعاف وركبت فيها.. وخاصه انها كانت حاسه بخوف عليه مسكين نقذها وماهتم لنفسه.. من كثر خوفها عليه حبت تروح بروحها تتطمن عليه.. لانه كانت حالته وايد خطيرة وخاصه بعد اللي شافته يوم وصلوا المستشفى كيف كانوا الاطباء يتراكضون ويحاولون يدخلونه غرفة العمليات بسرعه.. تمت ود تحاتي.. شو بيكون مصيره وخاصه انه فيه ضيق تنفس معقوله يصير به شيء.. حرام توه شباب شو بيقولون اهله اكيد خايفين عليه اللحين وخاصه انه ماسافر لهم.. تذكرت اهلها.. راحت صوب السستر طلبت التلفون واتصلت البيت محد رد بيت ابوها.. ردت اتصلت حق امها ..
( الو .. كانتي وين ماما )
( ماما في ميلس عند باب حميد بابا سيف )
( ناديها بسرعه)
شوي الا تسمع صوت امها ...
( الو وينج ود امي شو فيج شو صار عليج .. هميتينا .. خبريني وين انتي )
( انا في المسشتفى ... بس اسمعي انا بخير تعالوا مستشفى دبي وبخبركم )
سكرت امها بسرعه اللي خبرت ابوها واخوها وبسرعه طلعوا عشان يسيرون يشوفون بنتهم ..
نادت الممرضه ود عشان تعرف اسم المريض وتاخذ بياناته.. ولانه ود ماتعرف شيء عنه اخترعت له اسم وسجلت رقم بيتهم ومبايلها ..

[جريح القلب..؟]

وصلوا اهلها وامها اللي تمت تحبها وتحضنها وتتخبرها .. في هذي اللحظة وصل الظابط ...
( انسه ود ممكن نسجل المحضر اللحين .. )
( ان شاء الله )
وراحت معاه صوب الكراسي الخاصين في الانتظار.. كان ابوها وامها مستغربين من اللي يشوفونه.. كانوا يقولون اكيد مسويه حادث بس هي بخير شو بيكون معقوله تكون هي داعمه حد وهو في المستشفى .. وتموا ينتظرونها ..
( انسه ود ممكن تقولين لنا شو صار بالضابط .. )
تمت ود تشرح للضابط من دخلت العماره وكيف انه ماكان في اي بواب وعن شكوة السكان.. وضرايب السكيورتيين.. وبالنهاية قالت له انه هي متنازله عن اي شكوى وماتدري اذا ثابت ناوي يرفع اي شكوى عليها.. سكر الظابط المحضر وقال لها انه بيرد بكرى الصبح عشان يسمع ثابت اذا قام من العمليه ..
رجعت صوب اهلها اللي كانت مرسومه على ويوهم كل علامات الاستفهام.. يسلت وبدت تخبرهم كل شيء ولانه هي عمرها ماجذبت على ابوها قالت له كل الموضوع لين ما ياهم الضابط اللحين وشو قالها ..
)يابنتي ليش ما اتصلتي بامج ولا بخالج .. )
( كانت تلفوني مفاضي .. والريال كان ماعنده تلفون )
( يابنتي واللحين كيف حالته الريال اللحين )
( مادري والله من ينا هني والمسكين في غرفة العمليات .. )
بو ود كان وايد واثق فيها .. وعمره ماهتم لاي شيء .. اهم شيء سلامة بنته بعكس سيف .
( هذا يوم اقولكم لاتعطونها سيارة وتخلونها روحها .. هذا سبب اهمالكم وثقتكم الزايده )
( بس يا سيف بنتي ود اشرف من اي بنت وانا ثقتي فيها اكبر من شخص ولو كنت افكر في يوم اني اشك فيها كنت شكيت في امها قبل )
( امها حرمه وام عيال لليوم ماطلعت ليسن )
(اسمع يا سيف الموضوع من زمان خلصنا منه .. هذي بنتي وانا حر في تربيتها .. )
سكتتم ود ولانها متعوده على هذا النوع من الكلام ماهتمت فيه وايد.. لانها من زمان كانت تسمع خالها وكان دايم يلوم امها على موضوع سيراتها وروحاتها بروحها.. وخاصة الفترة اللي عاشت فيها مع امها.. كانت من اتعس اوقات حياتها لدرجة انه في اخر ويك اند كانت تزور فيه ابوها.. قالت له انه ماتبا تعيش عند خالها ابد وهذا اللي خله حميد يتضارب مع سيف وشل عنهم بنته اللي عاشت وياه من كان عمرها 10 سنوات وخاصة انه ام حميد كانت متوفيه قريب فاصر انها تم وماردت بيت خالها الا نادر او في الزيارات.. اللي كانت تروحها يوم خالها يكون مب موجود وفي المرات اللي كانت تشوفه كان هو يتجنبها عشان ماتكلمه عن موضوع رجوع ابوها لامها ..
طلعت السستر من غرفة العمليات.. ويت صوب ود وطمنتها على ثابت وقالت لها انه في العناية وحالته احسن بوايد.. واحتمال بكرى ينش من البنج طمنت ود وقررت ترد البيت مع ابوها.. وامها قررت ترد مع بنتها بيت طليقها عشان تم مع بنتها وخاصه بعد اللي تعرضت له ..
بعد ماطلعت ود مع ابوها وامها اللي راحوا صوب بيتها مع ابوها وتركهم سيف وركب سيارته وراح صوب بيته
وصلت ود.. وبعد ماقعدت مع ابوها وامها استئذنت منهم وراحت تاخذ دش عشان ترقد وخاصه انها مارقدت طول الليل ..
( خلاص عيل يا امي ... انا بسير صوب بيت اخوي بتصل في الدريول يي يشلني )
( لايا فاطمه ركبي وانا بوصلج )
العلاقه بين امها وابوها.. كان شبه علاقة مقطوعه.. رغم كل المحاولات اللي سوها ابو ود بس موقف سيف وموقف فاطمة.. كان اقوى ..
( خلاص عيل يالله .. )
ركبت السيارة مع حميد كانت هذي اول مره تركب فيها السيارة معاه بعد الطلاق.. غمضت عينها فاطمة تذكرت ود يوم كانت صغيره يوم كانوا يسيرون ويتشرون لها العاب وايس كريم وحب حميد اللي كان يحاول يقطع نفسه بين رضاها ورضى امه اللي غلبها بالنهاية ..
( فاطمة .. للحين مصره انه نفترق ونتم طول عمارنا عايشين كل واحد بيت )
( يا حميد انته عارف رايي ماله داعي تفتح الموضوع )
( يعني اللي تعرضت له بنتج ماخلاج تخافين.. انها تتعرض لموقف اشد واحنا كل واحد منا بصوب ..ارجوج يافاطمه فكري.. انتي يالسه تحكمين علينا بالفشل.. انا عارف اني غلطت يوم تنازلت عنج بهذي السهوله بس انتي عاقبتيني طول حياتج .. )
فاطمه تذكرت كل الاحداث اللي صارت ودمعت عينها.. تذكرت كيف تمسكت فيه وهو توه باول شبابه ..ماكان يملك اي شيء رغم انه اهلها عندهم الخير بس كانت تحبه.. لانها ربت معاه من يوم صغار.. كان جارهم وعمرها ماتمنت غيره.. شو اللي تغير معقوله امه قدرت تخليها تكره الانسان اللي وقفت جدام الكل عشان تاخذه وبالنهاية فشلت في انه تنجح زواجها.. تمت ساكته لين وصوا البيت.. ونزلت وحدرت البيت بعد ماقالت حق حميد يحط باله على ود..
.

[جريح القلب..؟]

==========================
الساعه 7 الصبح يوم الجمعه نشت ود من وقت تلبست ونزلت تحت لقت ابوها يالس في الصاله يقرا الجرايد.. طلبت منه انه يوصلها للعماره عشان تاخذ سيارتها.. وبعد ماوصلها قالت له انها بتروح صوب المستشفى عشان تتطمن على الريال اللي نقذها.. قالها مايحتاي تسير لانه بنفسه الظهر بيروح وياها.. بس هي اصرت تروح الحين بس شوي.. وبعد الظهر بتروح مره ثانية ولانه ابوها كان يعرف بطيبة ود وتعاطفها خلاها
في الطريق مرت محل ورود واشترت باقه ورد كلها بيضاء ..ومنسقه بشكل جميل وطلعت صوب المستشفى ..
يوم وصلت المستشفى دخلت بسرعه.. سالت السستر عن حالته قالوا لها انه بخير وودوه وفق وخاصه انه كان معاه شخص بس ماعرفت من هذا الشخص من السستر.. يوم طلعت فوق لقت شخص كان توه بيطلع من الغرفة ..
( السلام عليكم هذي غرفة الاستاذ ثابت )
استغرب الريال منها ومب عارف هي منو ..تحسب انها يايه من الجريده عشان الحادثة الغريبة وخاصه انهم ناس معروفين.. فقرر انه مايخليها تشوف ثابت ..
( هيه من انتي ... )
( انا ) ماعرفت ود ترد عليه وفي الاخير .. ( انا حبيت اتطمن عليه )
( هو بخير والحين ماعطينه حبة منوم لانه طول اللي تم قاعد وماياه نوم )
( اوكي خلاص يوم بيطلع قوله ود تسلم عليك )
طلعت ود وهي حاسه انه خلاص هي سوت الواجب.. رغم انها كانت تتمنى تشوف ثابت وتتطمن عليه اكثر.. ثابت اللي بدى يشغل جزء بسيط من حياتها .. وقالت الظهر برجع مع ابوي وبشوفه ..
الظهر بعد صلاة الجمعه.. تغدت ود مع ابوها وبعدين مرت على امها وقعدت شوي عندها وعلى الساعه 3 راحت مع ابوها المستشفى .. خبرته ود انه بخير وكان معاه حد من اهله.. استغربت كيف دروا عنه وهي معطتهم رقمها واسم غير, قالت يمكن هو لما نش عدل المعلومات
وصلت ود وراحوا صوب الغرفة اللي تفاجئت ود انه الغرفة فاضية ولا كنه قبل كم ساعه كان فيها اي شخص.. راحت صوب الممرضه اللي قالت انه الشخص اللي كان هني طلع استحت ود انه تسال السستر عنه اكثر.. لانه ابوها كان معاها.. فطلعت وهي تحس انه خلاص ماراح تشوف ثابت ابد ..
ثاني يوم في البنك الكل كان يتحمد لها بالسلامه وخاصه انهم عرفوا عن الموقف اللي تعرضت له ..منهم ضحك ومنهم تاثر.. بعد الظهر شافت المدير اللي تحمد لها بالسلامه وشكرها وعقب قال لها انه وده تروح صوب الفرع اللي موجود في المطار عشان تشيك على بعض الحسابات هناك.. وراحت العصر هناك وبعد ماخلصت شغلها قررت انها تشرب كوفي وتتمشى في السوق الحرة شوي يمكن تلقى شيء يعجبها من العطور ..
وهي تتمشى لقت شخص مالوف يالس على طرف ومحد يالس معاه.. قربت صوبه كان ثابت.. فرحت قالت اكيد بيروح حق ابوه.. يوم وصلت قربه
( السلام عليك ثابت شحالك وشو صحتك .. )
رفع ثابت ويهه لها بس كانت نظرته وايد حزينه .. خافت ود انه ابوه يكون مريض او فيه شيء .
( ثابت رد علي بلاك ساكت شو نسيتني .. عنبوه مب يوم كامل هذا اللي نساك الحادث )
(.....................................)
( تعال لاتكون معاك الحبيبه ورابطه لسانك عشان ما تكلم بنات يوم درت انه طوال اللي انحبست مع بنت في اللفت )
بعد تم ساكت ومارد عليها ..
( خلاص ما اعطلك باي ... )
ود استغربت من رده فعل ثابت معقوله يكون نساها.. معقوله يكون ماتذكرها.. بلاه يمكن الحادث اثر في عقله قالت ود.. بعدها ود نزلت طلعت من المطار.. وهي تحس بانه حلم من احلامها تبخر خلاص.. يمكن يكون حلم صار صدفة وتبخر بعد صدفة حاولت تشغل نفسها في اليومين اللي عقب.. تذكرت مشروعها وانه لازم تتصل بالضابط عشان الورقة.. وبالفعل ثاني يوم بعد الدوام اتصلت بالضابط
( الو السلام عليك ..)
( من معاي .. اختي )
( انا ود حميد اللي انحبست في اللفت من كم يوم )
( اه تذكرتج شو اخبارج وشو الصحه .. ان شاء الله ثابت بخير وطلع من المستشفى )
تذكرت ود جذبتها وكملت مع الضابط ..
( ايه بخير ورجع شغله )
( معقوله.. يشفى في يومين.. انا حاولت اسمع منه كلمه يوم المحضر ماقال اي شيء.. ولو مب وجود زوج اخته كنت ماعرفت شو اسوي )
( ليش شو صار ... ) كانت ود تساله وهي منصدمه شو السالفة قالت في خاطرها
(ليش ماخبرج صالح نسيبكم انه ماطاع يكتب اي شيء لنا .. )
( وليش يكتب )
( بلاج يا انسه ود.. طبيعي اللي ينصاب بالبكم يستخدم يده في التعبير عن الكلام ..ولا كيف انتي تتفاهمين معاه.. ولا انتي عشان خطيبيته تفهمين تعابيره بون كلام )
حست ود والضابط يقولها هذا الكلام كان حد صفعها صفعه قويه على ويها بسرعه قعدت لانها حست انه ضربتها دورة.. والارض مب قادرة تتحملها
( ايه ايه بس تعرف الحادث ماكان هين.. على العموم انا بس حبيت اطلب ورقه عشان دوامي عن سبب تاخيري يوم الخميس وبس )
( مري علي بكرة وخذيها وسلمي على ثابت )
( ان شاء الله ..)
بسرعه حاولت ود تسكر التلفون عن الضابط عشان مايكتشف جذبها.. وانه ثابت مايصير لها شيء ..
تمت تفكر فيه.. حست انه هي السبب في اللي تعرض له ..معقوله يوم شافته ونظرات الحزن بعينه.. وهي تكلمه بكل استخفاف شو كان يتحسبها يالسه تتمسخر عليه وخاصه انه زوج اخته اكيد خبره انها مرت.. بس هي ماكانت تدري محد خبرها الكل قالها انه بخير .. حست ود بانها بتنفجر من داخلها.. بسرعه طلعت من البيت خذت سيارتها وراحت صوب البحر اللي كانت دايم تروح له.. نزلت حست بانها محتاجه تصارخ وطاحت على الارض وهي تصيح.. وتصيح.. حست انه فقدته الى الابد .. الى الابد ..
كانت سياره واقفه قربها وكان صوت المسجل عالي .. كانت اغنيه لكاظم ..
مو ضحكتك.. لا دفوا ايدك ولا رقه كلامك.. مو لهفتك.. تصور انته قبال عيني وبين ايديه ماعرفتك.. تذكرت اغنيته وصوته الحلو يوم غنى لها في اليوم اللي انحبست معاه في اللفت.. حست انه الدنيا تدور.. حست انه الفرح خلاص انتهى من حياتها ..هي السبب.. هي السبب وتمت تصيح.. ماعرفت كم ساعه بقت على البحر.. ولا ردت على اي تلفون.. كانت تبا تكون روحها.. حست انها وحيده لاول مره بحياتها حست انها يتيمة ..
ركبت سيارتها كانت امها تتصل ...
( الو وينج ود شو بتخوفيني عليج مره ثانيه )
ردت ونبرت الصياح باينه على صوتها ( انا كنت محتاجه وقت بروحي )
( شو فيج ود علميني شو فيج حبيبتي شيء يعورج .. انتي وين في البيت ايج .. )
( لا انا قربج بيج انا بس ارجوج يا امي مابا اشوف حد ارجوج ... )
راحت صوب بيت امها.. وصلت.. حست انه محتاج تحضن امها.. في وسط الحوي لوت على امها وتمت تصيح.. كانت فاطمة مب عارف شو صاير بس من دموع بنتها صاحت وياها.. حست انه بنتها فيها شيء معقوله ود الحبوبه الفرفوشه تصيح بهذي الحرقة والقهر.. كانه حد صاير فيه شيء
( لاتخوفيني ود شو فيج يابنتي .... علميني ابوج فيه شيء حد مزعلج شو فيج يابنتي خوفتيني عليج .. )
( يامي انا السبب .. انا السبب .. كله مني لو ما انقذني كان اللحين بخير .. )
( من هذا يا ود من.. ) كانت ام ود تحاول تفهم شيء من كلام بنتها بس بدون فايدة ...
( امي ارجوج ابا ارقد ابا اكون روحي مابا اشوف حد.. ارجوج يامي.. تعالي معاي البيت تعالي انا محتاجه لج.. انا يتيمه.. بدونج انا يتيمه لاتخليني روحي انا اباكم انتي وابوي معاي انا وحيده دونكم انتوا ..ماتحبوني ماتبوني.. يوم كامل وانا ضايعه محد درى عني.. محد سال ) ورجعت تصيح اشد من قبل كل شيء تيمع على ود.. فراق ابوها وامها.. وحدتها.. غربتها بينهم.. وهي تحاول تلمهم عشان تقدر تعيش معاهم.. كل شيء كان في بالها وفوق هذا كله ثابت الشاب اللي له مستقبل هي كانت السبب في انه يصير ابكم ..

[جريح القلب..؟]

كانت فاطمه رغم قوتها الا انها ضعفت.. عشان بنتها.. حست انه الله رزقها هالبنت كيف تحرق قلبها.. كيف قدرت تعاند كل هالسنين وهي تشوف بنتها تتعذب ينها وبين زوجها.. قررت شيء في قلبها ..ودخلت ود معاها وسكرت الباب.. ود من كثر ماصاحت رقدت في حضن امها اللي كانت لاصقه فيها.. حست انه بنتها في امس الحاجه لها.. قالت في نفسها كل شيء يهون عشانج يا ود ..
بعد مارقدت ود وتاكدت انه مب محتجتها في هاللحظة .. راحت صوب التلفون واتصلت ..
( السلام عليك هلا حميد لاتحاتي ود عندي )
( الله يطمنج بالخير .. كنت وايد احاتيها .. )
( حميد بقيتك في موضوع ..)
( تفضلي .. يا ام ود انتي تامرين ..)
( للحين عرضك بالزواج قائم )
( ولين اموت ... )
( خلاص تعال الصبح وبنروح صوب المحكمه عشان نملج .. )
( والله.. سمعيني ايها مره ثانيه ... والله هذا احلى خبر يا فاطمة .. معقوله .. وافقتي )
( ود يا حميد ياتني اليوم وكانت تصيح.. قلبي تقطع وهي تقول انها يتيمه وانها وحيده.. والله ذبحتني بكلمتها معقوله بنتنا تحس باليتم واحنا للحين عايشين )
( وسيف يا فاطمة شو قال )
( هو مايدري ... انته تعال وبكرى بنحطه جدام الامر الواقع .. )
( خلاص من الساعه 6 انا عند الباب .. )
حست ام ود انه حميد رد مثل قبل يوم كان متهور يوم كان يسوي كل اللي في باله.. فكرت في سيف وحست انه اكيد بيزعل من اللي بتسويه.. حست انه عمرها ضاع لاهي قدرت تتزوج بعد حميد لانها للحين تحبه ولا عندها شيء تسويه بعد ما طلعت ما تقاعدت من المدرسه وقالت في خاطرها اخر شي بيرضى لانه سيف قلبه طيب ... مثل مارضى قبل بيرضى عقب ..
الصبح الساعه 6 كان بالفعل حميد عند الباب ..كانت ود للحين راقدة.. نشت امها وتلبست وشلت جوازها وراحت مع حميد صوب المحكمه ..وبالفعل رجعت فاطمة زوجة حميد اللي كان طاير من الفرح.. ويوم وصلت البيت .. كان سيف يالس يترياها ..
( وين كنتي يا فاطمة .. وش مطلعنج من الصبح .. ود فيها شيء )
( لا ود بايته عندي بس طلعت مع حميد صوب المحكمه وملجنا .. )
( شو تقولين يا فاطمة .. انتي فاطمة انتي تسوين جذية .. ليش انا مالي شور ... انا مب اخوج )
( ياسيف انته الخير والبركه بس بنتي يا سيف محتاجتني وانته مب راضي .. كم سنه وحميد يحاول معاك بس انته مب راضي .. والصراحه ما اقدر اشوف البنت اللي طلعت فيها من الدينا .. تباني واتخلى عنها ... )
( ود طول عمرها ماشتكت شو اللي تغير .. شو اللي صاير .. )
كان سيف معصب ومنصدم من فاطمة اللي ماشورته وراحت تتزوج حميد ..مب يكفي انها مره طاوعت حميد واصرت تاخذه ورضخوا كلهم لقرارها وبالنهاية جرحها وطلقها كيف ترجع له بعد كل هذا وكل اللي سواه فيها ..
) سيف انا ماعندي الا هذي البنت يوم اشوفها تنهار جدامي.. وتحتاجني وياها شو تباني اسوي.. اخليها عشان ماضي لا يقدم ولا ييأخر .. يا سيف هذي بنتي الوحيده .. والله لو تبا روحي .. ماقصرتها عنها ... )
( سمعي يافاطمة.. قسم بالله لو رديتي لي مره ثاني وانتي مطلقة لا تقولين اخوي وبيستقبلني في بيته.. حزتها انسي انه لج اخو اسمه سيف .. روحي شوفي لج بيت ثاني )
سمعت ود اخر جمله .. من كلام خالها.. وماكانت عارفه شو صاير.. طلعت في الصاله حاولت توصل لامها بس اغمى عليها .

[جريح القلب..؟]

=======================
كانت فاطمة مب قادره تتحرك وهي تشوف بنتها جدامها .. منهاره .. صرخت على سيف ..
(تبا اذبح بنتي عشان عنادك ... )
ركض سيف حق ود حاول يشيلها عشان يوديها على السرير.. على انه سيف عنيد وراسه مايلين بس بعد هذي اخته وبنت اخته.. كيف يعذبهم .. وليش يعذبهم ..عشان الماضي ..
بعد ما حط سيف ود على السرير .. وحاول هو وفاطمه انها تقوم .. وماكان محاولتهم تيب أي نتيجه .. طلع صوب الدكتور عشان يبيه لها.. بعد ما ياهم الدكتور اللي كشف على ود .. خبرهم انها بخير بس محتاجه لراحه تامه وهدوء ..
فاطمة بعد ماراح الدكتور قعد في الصاله تصيح على بنتها الورده اللي تشوفها انطفت فرحتها فجاءة ..
سيف يوم دخل على فاطمة ولقاها تصيح .. قعد جنبها ..
( سامحيني يا اختي ... سامحيني .. )
( شو اقولك يا سيف انته اخوي الوحيد اللي ماله غنى عنه.. بس هذي بنتي يا سيف ..تخيل لو هدى صاير فيها شيء.. كنت اخرت أي شيء عنها )
(والله ياختي ما اعرف شو اقولج بس انا خايف عليج .. انتي في البداية عارضتي الكل.. وخذتي حميد .. شو صار .. طلقج ورجعتي بين اهلج .. واللحين شو بيصير اذا نزلتي نفسج له )
( يا سيف يا اخوي انته اكثر انسان كان عارف اشكثر حميد حاول يردني بعد ماتوفت امه اللي كانت السبب في طلاقنا.. بس تبا الصدق .. بعد كل هذا العمر انا اقولك انه حميد كان انسان بار بامه.. حتى لو كان هذا الشيء على حساب سعادته.. انا ام يا سيف وما حسيت الا يوم شفت ود تكبر جدامي وهي تحاول ترضيني وترضي ابوها وترضي الكل على حساب نفسها وسعادتها.. بالنهاية شو صار بنتي انهارت.. يمكن حميد تحمل لانه في ذلك الوقت كان اكبر من ود بس ود يا سيف توها صغيرة.. وتحملت العذاب من صغرها.. وانا الانانيه اللي فضلت نفسي على بنتي ... خلاص ماراح اتمادى وراح اعيش مع ابوها .. وتعيش معانا في بيت واحد )
( سوي اللي يريحج يافاطمة وسامحيني ان غلطت عليج .. تراج اختي وماتهونين )
بعد ماطلع سيف من البيت راحت فاطمة صوب بنتها ... لقت ود يالسه وسرحانه ..
( فديت بنتي شو فيها يقول الدكتور انها تعبانه )
ماردت ود على امها وحست انه قلبها يعورها ...
( امي قلبي وايد يعورني احس اني بموت )
( بسم الله عليج ياعل يومي قبل يومج .. شو هالكلام يا ود .. خلي ايمانج بالله قوي .. كل انسان يتعرض لمصايب في حياته .. ولكن لازم نكون اقوياء عشان نقدر نعيش ونكمل حياتنا )
( بس يامي انا احس حياتي انتهت مالها أي طعم ... )
( ود ابا اخبرج شيء يمكن يكون سعيد بالنسبة لج ... وشيء تمنيتيه طول حياتج )
( شو ... )
رغم الاحساس بالتعب والارهاق اللي كانت تحسه ود .. الا انها حست بالامل ... وقبل لاتقول امها كلمه
( نويتي ترجعين لابوي ... )
( الا رجعت له اليوم الصبح في المحكمه )
ود حست انها بخير ومافيها أي شيء نست كل المها وتعبها.. نست احساسها بالوحده والضيقه.. كل اللي كانت تحسه انها سعيده سعيده وبس ... حضنت امها وتمت تبوسها وهي تبارك لامها .
( اخيراً بيكون لي ام وابوا في بيت واحد ..اخيراً بعيش معاكم انتوا الاثنين.. اخيراً بنصير اسرة وحده.. افتخر بكم جدام الكل.. اخيراً بكتب في اوراقي.. اعيش مع اب وام.. يالله يامي ماتتصورين كيف سعادتي.. احس اني ابا اطير .. اطير من الفرحه .. )
( فديتج يا ود ... انا كم بنت عندي الا ود .. اشوفها تحتاجني .. واتخلى عنها .. )
( احبج يامي .. احبج ... انا خلاص بقدم استقاله من الدوام.. بتم معاج انتي وابوي في البيت اباكم تعوضوني الحين. في وجودكم ابا اكون معاكم وبس )
( اللي تبينه بيصير .. )
اتصلت ود في ابوها وباركت له وقالت له انها خلاص ماتبى تشتغل وراح تم معاهم ..وطلبت من ابوها وامها انها تسافر معاهم أي مكان في العالم بس عشان تخلي الناس يشفون انه لها ام وابو واسرة وبيت واحد.. وافق ابوها.. وخبرها انه راح يوديهم اول شيء العمره .. وبعدين بيرحون صلاله وبيتمون هناك شهر ..
فاطمة اللي حست انه قرارها كان صح .. وبالذات بعد ما شافت ود كيف فرحانه ..
اليوم الثاني ود راحت الدوام وهي ناويه تقدم استقالتها.. كان وجود امها وابوها اهم من الدوام عندها الدوام اللي كانت دافنه نفسها فيه عشان ما تحس انها وحيده بس اللحين ... خلاص ..
(شو هيدا ود استقاله .... )
( والله ياسونيا انا ابا اطلع ابا اسافرمع ابوي وامي واحتمال ما ارجع الا بعد شهرين ... )
( مابعرف شو بقلك بس راجعي قرارك ... شو في الاستاذ علي يمكن يعطكي اجازة بدون راتب )
( تصدقين مافكرت فيها خلاص .. )
راحت ود صوب الاستاذ علي وطلبت انها تشوفه من السكرتيره ... اللي قالت لها تفضلي ..
( هلا انسة ود ... شو الصحه .. )
( تمام )
( شكلج مرهق .. شو ياود لايكون حنا نرهقج في العمل )
( لا ياستاذ علي بالعكس بس بخصوص العمل انا حبيت اخذ اجازة بدون راتب )
( ليش ياود شو صاير .. عسى ماشر )
( لا بس ابوي وامي بيسفرون وابا اسفر معاهم )
( بس يا ود انتي لج مستقبل .. والسفر لاحقه عليه )
كانت ود تقول في خاطرها ليت تدري انه هذي اول سفره اسفرها مثل أي بنت تحس ابوها وامها معاها ... بس ردت
( والله ياستاذ علي .. كنت اتمنى انك تعطيني اجازة بدون راتب.. بس شكلكم تبوني اقدم استقاله )
( لا يود افا .. خلاص بس بعطيج اجازة بدون راتب ... كم تبين .. )
( شهرين )
( مب وايد ... )
( لا بس هذا الوقت هو اللي بيسافرون فيه وبيرجعون .. فيه )
وافق لها المدير اللي كانت ود وايد تعجبه باخلاصها ونشاطها
كانت تجهز اوراقها يوم تذكرت موعدها مع الدكتوره اللي يصادف اليوم الاربعاء وتذكرت ربيعاتها اللي لحد الحين مايدرون عن شيء.. قررت تتصل في امل وتاكد موعدها معاهم بالخميس ..
( الو هلا امل )
( وينج يالظالمه اسبوع ماتتصلين .. )
( والله لو اقولج شو صار في هذا الاسبوع كنتي عذرتيني )
( شو عرستي والله اذبحج واذبحه ... )
( ههههههه لا بس صارت احداث كثيرة ... خليني يوم اشوفكم بكرى اقولكم كل شيء )
( خلاص صار ... )
( اسمعي قولي للبنات انه ضروري لاني السبت بسافر .. مع امي وابوي
)

( شو ابوج وامج ..)
( هي ردوا حق بعض .. )
(صدق .. قولي والله ... الف الف مبروك ياود )
( الحمدلله ... احلى امنيه تحققت في حياتي )
(تستاهلين ياود ... اصلاً كان المفروض من زمان عمي وعمتي يرجعون لبعض )
( يالله هذا اللي صار )
(الحمدلله )
....

[جريح القلب..؟]

( خلاص على الوعد يوم الخميس اوكيه )
سكرت ود وراحت سيارتها عشان تروح صوب الدكتورة.. ويوم وصلت ود حست انه الدنيا ترجعها لماضي.. صار لها من زمان مب كانه من اسبوع.. الماضي هذا مسح كل شيء وماخلاه الا اليوم اللي انحبست فيه في اللفت مع ثابت ..
يوم دخلت من الباب كانت تسترجع كل دقيقة ... شافت 4 سكيورتين يالسين .. في العماره عند المدخل ابتسمت وتذكرت اخر مره يوم يتضاربون.. كانت رايح صوب اللفت.. كانت تتخيل انه من الدق على الزر راح تشوف ثابت.. بس يوم دقت لقت محد موجود وحتى اللفت شكله غير .. دخلت كبست على الرقم 30 ..
كانت تتذكر كل شيء صار.. يوم كان يتأفف منها ويعصب عليها.. يوم كان يضحك عليها ويم يفكر فيها ويخبرها عن استغرابه منها , يوم كان يغني لها .. يوم كان بيموت في يدها وحتى اللحظات اللي قعدوا ياكلون فيها.. يوم قسم السندويج بينهم ..كل شيء خلاها تحس من داخلها انه شغل كل حيز فيها وملك قلبها.. رغم كل شيء حبته حست انه ملكها بكل شيء.. في داخلها كانت تتصارع مع نفسها اللي كانت تقولها انتي تشفقين عليه.. وهي تقول لا انا حبيته .. قبل لااعرف انه مريض ..
وصلت للدكتورة ودخلت عليها وخلصت معاها.. يوم يت بتطلع تذكرت انه هو كان عند دكتور الحنجرة والقصبة الهوائية بسبة الضيق اللي كان ياينه.. سالت الممرضه عن اسمه اللي حاولت تساعدها بس كان وايدين اسمهم ثابت ووايدين يتعالجون هني.. فكرت قالت لها التاريخ والساعه في النهاية لقت اسمه بس ماكان جنبه أي بيانات غير اسمه وعمره (ثابت سعيد بن محمد) 25 سنه.. حست بقلبها ينقبض ويتعصر عليه الشاب اللي توه عمره 25 سنه يصير ابكم.. يودت نفسها.. شكرت السستر وطلعت ...
يوم ركبت السيارة تركت المجال لدموعها اللي حاولت تخفيها عن أي حد حتى عن امها كانت تفكر فيه في كل لحظة وفي كل مكان ..
ثاني يوم كانت لازم تشوف صديقاتها مع انه مالها خاطر تشوف حد الا انه راحت على الموعد في المطعم اللي دوم يتقابلون فيه ..
(هلا ود كيف الحال )
( هلا موزه شو اخبارج واخبار جاسم وهنوده .. ان شاء الله كلهم طيبين )
( تمام .. كل شيء بخير بس الوحام معذبني وايد )
( فترة وتعدي يا موزه بس انتي وايد تفكرين )
( والله يامل شو اقولج .. مالي نفس في شيء حتى جاسم مالي نفس اكلمه او اطلع معاه او حتى اسوي له أي شيء )
(الله يعينج ويعينه عليج )
( ياله ود خبرينا شو سالفة السفر وسالفة ابوج وامج )
( هذا ولا شيء خلوني اخبركم سالفة اللفت .. )
يلست ود تخبرهم عن اللي صار معاها .. وعن كل شيء صار وعن ابوها وامها واحساسها بالذنب اتجاه ثابت ..
( بس معقوله ياود يسافر وماتعرفين شيء عنه )
( تصدقين ماعرفت الا اسمه امس من النرس في العياده )
( شو كان اسمه ... )
( اسمه ثابت سعيد بن محمد )
( شوووو .... !!)
( شو فيج موزه ...لايكون تعرفينه .. )
( تعرفين منو هذا )
امل وود وسوزان ..( لا )
( تعرفون من فترة .. يوم سووو تكريم .. في التلفزيون حق افضل مشروع تجاري .. )
( هيه )
( كان هذا الشخص هو اصغر رجل اعمال وصاحب افضل مشروع وكرموه على هذا الاساس وخاصه انه ابوه سعيد بن محمد صاحب اكبر شركات .. في الدوله )
ود حست بضيق لانها هي السبب في انه مستقبله يضيع.. حاولت تمسك نفسها قدام صديقاتها ..كانت امل اقرب وحده لها وحست انه فيها شيء وخاصة من اللي لاحضتة على ويها من اهتمام.. بعد ماطلعوا من المطعم وكل وحده ركبت سيارتها.. اتصلت امل بود
( هلا ود )
( هلا امل .. شو ماشبعتي رمسه)
( ود لاتحاولين تكونين جدامي قويه .. وانتي تتقطعين من داخل )
( شو صاير امل )
كانت ود مستغربه كيف حست امل فيها
( لا بس حسيت انه فيج شيء .. شو انتي حبيتي ثابت )
( لا بس انا اشفق عليه واحس اني مذنبه في حقه و.... ) كانت ود تحاول تقنع نفسها بهذا الكلام ..من فترة بس امل كشفتها وبسهوله
( لاتحاولين تقنعيني بشيء يالسه تقنعين فيه نفسج ..ود انتي من حقج تعيشين وتحلمين وتحبين وتتزوجين.. بس تحملي تسوين شيء تندمين عليه في يوم .. )
( ادري يا امل على العموم انا بسافر يوم السبت مع ابوي وامي .. وان شاء الله تكون سفره .. موفقة )
( ان شاء الله )
سكرت ود اللي حست انها مكشوفه وانها ماتروم تخش شيء.. رجعت البيت ولقت ابوها وامها يالسين في الصاله.. سلمت ودخلت حجرتها ..قعدت على السرير وهي تفكر في ثابت.. شو يسوي الحين شو اخبار ابوه المريض.. كانت تحترق ودها تعرف أي شيء عنه .. بالنهاية يلست تطلع ثيابها عشان تتجهز للسفر ..
يوم السبت سافرت ود مع ابوها وامها العمرة وبيتمون في مكه اسبوع وفي المدينه اسبوعين وبعدها بيرحون صلالة وبيتمون شهر هناك ..

[جريح القلب..؟]

==============
*اوروبـــا *
في غرفة خاصة .. في مستشفى مايو كلينك.. ثابت كان على السرير ويقراء الجريدة.. دخلت عليه اخته ..
( هلا ثابت اشحالك اليوم )
اشر لها براسه ... انه بخير ..
( فديتك يا الغالي .. كلها يومين وتستوي العمليه وترجع احسن من قبل ..)
كان عنده لوح ابيض يكتب عليه اي شيء يباه .. كتب لها .. باذن الله يا اختي .. انا توكلت على الله ..
( يبت لك الاغراض اللي طلبتها .. قلم .... ودفتر .. )
( هز راسه انه يشكرها )
اخت ثابت.. شما كانت اقرب انسانه منه.. ولحد اليوم محد عرف اي شيء عن الحادث.. كل اللي عرفوه من الضابط انه اللفت تقطعت حباله وثابت كان فيه وبسبه الرضه القويه اللي ياته فقد حاسه النطق.. ولكن الدكتور قالهم انه اذا سافر يمكن يلقون له علاج.. وكانت اخته.. موجوده في الامارات يوم ياهم اتصال من الشرطه.. يتخبرون عن السيارة اللي موجوده يومين قدام العمارة.. واللي باسم ثابت سعيد.. ولانه سهيل كان شريك ثابت من سمع على طول سوى اتصالاته وقدر يوصل له خلال ساعه من تبليغهم عن السيارة.. ويوم درى عن الحادث بلغ شما اللي على طول راحت المستشفى وباتت عنده طول الليل.. وفي اقل من 10 ساعات كانت تقاريره في لندن اللي اكدوا انه ممكن يجري الفحوصات.. عشان جذيه استعيل انه يسافر وماكان يبا ود تشوفه لانه يدري بقلبها وطيبتها وكانت لابد ماتمر.. وما كان يباها تشوفه بهذي الحاله وخاصه يوم سمع صوتها عند الباب ترمس سهيل انقبض قلبه.. خاف انه سهيل يدخلها .. بس حمد الله يوم ما خلاها.. ويوم رجع له قاله صحفية مرت اسمها ود سكت ثابت وماعلق على اي شيء.. بس يوم شاف الورد.. قال في قلبه ود يابت لي باقة بيضاء.. لو حست بشيء اتجاهي كانت يابت باقة حمراء.. على الاقل اشارة تدل على انه ممكن يكون في قلبها شيء من ناحيتي ..
وعلى يوم السبت العصر.. سافروا كلهم خاصة انه ابوهم تأجلت عمليته لانه الدكتور اللي كان بيسوي العملية تاخرت طيارته .. فقرروا يأجلون العملية.. وكانت بتصير في نفس اليوم اللي وصل فيه ثابت.. كان ابوه في غرفة العمليات.. وسواها ونجحت ...
ام ثابت بعد مانجحت عملية زوجها خبروها عن ثابت وعن الحادث.. المسكينه كانت مب عارف تصيح على ولدها ولا تفرح لزوجها .. بس الدكتور بعد ماشافه قال لهم انه ممكن يسوي العملية وانه في احتمال 80% بالمية تنجح.. ولانهم كانوا مؤمنين بالله توكلوا عليه ..
ثابت مع وجود اهله حوله كان باله في مكان ثاني.. كان باله في اليوم اللي عاشه مع ود بكل تفاصيله ..البنت اللي ماعمره شاف مثلها.. رغم انه انحبس معاها في اللفت ماهتم بالعكس كانت تحاول تلطف الجو وتحاول تخفي توترها وخوفها.. كانت قدام عينه قدوة للانسان القوي المؤمن بقدرة ربه المتوكل عليه.. كان يتذكر كلامها يوم كانت تقوله.. (لاني مؤمنه انه الله مايترك عبده في ضيقه .. وبعدين شو اخس عن الموت ..اذا بنموت هذي ساعتنا) كانت هذي الكلمه تتردد جدامه ويحس انه الله بيكون معاه ..حس بداخله قوة .. كانت قوة ود دافع انه يكون قوي ومايضعف لحظة.. حتى اليوم اللي شافها في المطار.. كان يشوفها من اول مادخلت السوق الحره .. وهي تتمشى في المحلات النسائية.. كان وده يملي عينه منها.. كان يشوفها وهو يدري انها مستحيل تكون له وهو بهذي الحاله وفي نفس الوقت كان يدري انه ود انسانه مب عاديه.. انسانه مستحيل تسوي علاقه معاه, لانه حس انها مب مثل اي بنت قد شافها ود انسانه واثقه من نفسها تخطط لكل شيء تسويه وتعمل الف حساب لاي خطوة.. هذا اللي حسه من خلال كلامها ومن تمسكها بحلمها .. كان في داخله يتمنى لها السعاده وتحقيق امانيها وكان يتمنى لنفسه انه الله يشفيه عشان يرجع مثل قبل.. يدري انه بسكوته جرحها بس ماحب يسبب لها اي شيء.. لانه يدري انه راح تلوم نفسها.. عشان جذيه لما يت صوبه في المطار ماقال لها اي شيء وتم ساكت عشان ماتشفق عليه .. كلمته شمه ونبهته من سرحانه وبعدين عطته كوفي ..
( ثابت.. ماخبرتني .. شو صار ذلك اليوم عليك ... كيف صار الحادث.. الصراحه يوم دريت كنت بموت عليك من الخوف )
كتب لها .. ( اذا نجحت العملية بخبرج شيء بتتفاجئين فيه )
( شو ثابت.. شو هذا الشيء اللي ممكن يفاجئني.. لاتقولي انه حد من منافسينك سوى بك هذا الحادث.. ترى والله اعلم سهيل وهو راح يتصرف .. انته تدري اشكثر سهيل يحبك )
كتب (لا محد سوالي شيء وادري بحب سهيل.. وحتى انا ...) وبعد تردد كتب ( شما ودي اقول لج كل اللي بقلبي بس لو اكتب لج لين الصبح مابخلص ... )
( ياخوي.. يا حبيبي بتسوي العملية وبتصير بخير .. وبتقولي كل شيء . بس انته توكل على الله )
هز راسه وكان في داخله يقول (يارب )
طلعت شما.. من عند ثابت طلع الدفتر وبدى يكتب ..
هل عندك شك انك احلى وأغلى امرأة في الدنيا واهم امرأه في الدنيا
هل عندك شك ان دخولك في قلبي هو اعظم يوم في التاريخ واجمل خبر في الدنيا
هل عندك شك انك عمري وحياتي وباني من عينيك سرقت النار وقمت بأخطر ثوراتي
ايتها الوردة والريحانة والياقوتة والسلطانة والشعبية والشرعية بين جميع الملكات
يا قمر يطلع كل مساء من نافذة الكلمات
يا اجمل وطن اولد فيه وادفن فيه وانشر فيه كتاباتي
غاليتي انت غاليتي لاادري كيف رماني الموج على قدميك
لاادري كيف مشيت الي وكيف مشيت اليك
دافئة انت كليلة حب من يوم طرقت الباب علي ابتدأ العمر ........... هل عند شك ... !
كم سار رقيقا قلبي حين تعلم بين يديك
كم كان كبير حظي حين عثرت يا عمري عليك يا نار تجتاح كياني يا فرح يطرد احزاني
يا جسدا يقطع مثل السف ويضرب مثل البركان
يا وجه يعبق مثل حقول الورد و ويركض نحوي كحسراني
قولي ..... قولي ...... قولي .......... قولي
قولي لي كيف سأنقذ نفسي من اشواق واحزاني
قولي لي ماذا افعل فيك انا في حالة ادمان
قولي ما الحل فأشواقي وصلت لحدود الهذيان
قاتلتي ترقص حافية القدمين بمدخل شرياني
من اين اتيت وكيف اتيت وكيف عصفت بوجداني
(ملاحظة / الكلمات لاغنية للفنان كاظم الساهر)
وبعدها كتب اسمها ود ..وكتب التاريخ اللي انحبسوا فيه.. اخر شيء كتب.. (سوف تكونين وتظلين اغلى انسان دخل بومضه.. ولم يخرج ابداً ...(
سكر ثابت الدفتر وحطه جنبه في الدرج.. حاول انه يرقد شوي بس ود كانت شاغله تفكيره لانه مستغرب من نفسه وايد.. من طلع للدنيا وهو اخر شيء ممكن يفكر فيه البنات.. من صغره ابوه رباه على الدين والاخلاق ..علمه انه الانسان اللي يحترم غيره الكل يحترمه.. وانه الريال يعمل الف حساب حق اهله وخواته اذا فكر انه يشوف بنات الناس لانه الانسان كما يفعل يجازى.. هذا الشيء خلى ثابت قبل لا يفكر انه يرمس بنت يفكر باخته شمه وسعيدة.. وعشان يقطع اي فعل ممكن يخليه يرتكب اي اثم او يغلط قرر انه بعد ما يشفى ويرد يتقدم ويخطبها لانه لقى فيها كل شيء ممكن يباه في زوجة المستقبل وام لعياله اللي يتمنى يكونون مثله. رجع ثابت بفكره الى الماضي.. من يوم كان صغير.. كان يحاول يشغل نفسه في شركه ابوه اللي علمه كل شيء.. كان عمره 20 يوم فتح اول شركه له بمجهوده الخاص.. وكان انسان ناجح في حياته درس ادارة الاعمال في الجامعة الامريكية ..وبعدها اخذ دورات وحاول يطور من نفسه.. عشان يوصل ويحقق اهدافه في انه يملك شركات متسلسله حول العالم تحمل اسمه.. لما كان يقول حلمه لاي شخص كان يضحك عليه ويقوله انته تحب تعيش الاحلام لكن بعد الجوائز والتكريمات اللي حصلها خلت الكل يثق به وبشغله حتى سهيل ريل شما اللي كان في البداية يضحك عليه بس يوم شاف انه كان صادق وطموح قرر انه يتعلم معاه ويمشى على نفس خططه.. ونجح معاه.. ثابت كان محبوب من الكل حتى ربعه.. حميد ومهير وسالم.. كلهم كانوا قبل لا يبتدون بأي شيء كانوا يلجؤون له في كل خطط حياتهم ..

[جريح القلب..؟]

==================
كانت افكار ثابت كلها في هذي اللحظة متوجه لود البنت اللي انبهر فيها.. كان يقول في خاطره ياترى بشوفها في يوم.. هل بتتذكرني بعد الحركه البايخه اللي سويتها لها.. بتتحسب الحين اني بالفعل ماكنت ابا اكلمها ..في قلبه كان شايل هم انه خسرها.. وفي عقله كان يدبر ويخطط كيف يوصل لها ويلقاها.. بس كان هدفه الحين يكون قوي وبس.. قوته هذي راح تكون لما يرجع بخير.. ويقدر يواجهها وهو في كامل صحته.. عشان يوم يتقدم لها يكون في كامل صحته مب انسان ناقص ..
في يوم العملية.. كان يالس على السرير يقراء قرأن.. دخلت عليه شما وتمت تترياه يخلص.. بعد ماخلص سلمت عليه ..
( ثابت شو معنوياتك..اكيد تب.. اسمع مب تدخل وتطلع ساكت اذبحك.. ابا من تخلص العمليه تهذر طول الليل والنهار ... )
ابتسم لها ثابت .. واشر لها برساه .. ( توكلي على الله )
*السعودية *
في نفس اللحظه هذي كانت ود في الحرم وكانت تتدعي من قلبها انه الله يشفي ثابت.. الريال الشهم اللي نقذها ولا فكر يأذيها بأي شيء.. ود كانت وايد تفكر فيه وبعد كل صلاة تدعي له بالشفاء.. كانت تحس انه الله معاها ويسمعها لانه استجاب لدعواتها ورجعت امها حق ابوها.. طلعت ود من الحرم ورجعت الفندق.. كانت تحس بخوف في قلبها مب عارفه من شو.. بس كانت طول الوقت تتدعي وتقراء عشان ما تستسلم لهذا الخوف وفي الصاله شافت ابوها وامها كانوا يتكلمون عن بيتهم اللي في البلاد .
( فاطمة.. انا ناوي اهش البيت وابني بيت اصغر هذا وايد كبير.. ودي اسوي بيت به 3 غرف وصاله كبيره وبدخل فيها حوض سباحه حق ود ... وابا اسوي حديقة داخليه لاشجار الظل شو رايج .)
( والله انا اشوف البيت زين حرام تهشه.. انا اقول نأجره ونبني بيت في جميرا الاولى افضل.. وخاصه انه عندي ارض وارثتها من ابوي الله يرحمه .. )
( ابويه.. حرام تهش البيت وانا اشوف امي على حق.. بس شوفوا عاد انا ابا اسوي لي سرير في غرفتكم.. يكفي العمر اللي راح وانحرمت منكم ..)
حضنت ود امها وابوها اللي كانوا فرحانين وفي قمة سعادتهم وهم يشوفون انه اخيراً التم شملهم ..
*اوروبا *
في المستشفى دخل ثابت غرفة العمليات.. والكل كان يدعي له.. امه واخته وريل اخته وابوه.. حتى اخته سعيده اللي كانت في امريكا مع ريلها خالد يات عشان ثابت.. وبعد مرور 10 ساعات طلع من عندهم الدكتور.. وقالهم لابد ماينتظرون لين الصبح عشان يعرفون النتيجه
طول اليوم كان ثابت في العناية المركزة واهله كلهم حوليه.. والكل يدعي له حتى ود اللي ماكانت تدري هو شو يسوي اللحين كانت تتدعي له انه يشفى .
الصبح والكل يرتقب هذي اللحظه اللي راح تحدد مصير ثابت.. هل بيظل ساكت او راح يتكلم.. بعد مادخل الدكتو وشاف ثابت اللي مارد على اي سؤال ولا جاوب.. طلع لهم وهو حاس بالفشل.. حاس بانه فشل انه ينقذ مريض ...
كلهم دخلوا له وهم يحاولون يخلون الوضع عادي.. طلع لهم ورقه كان كاتبها الليله اللي قبل لانه كان حاس انه العمليه راح تفشل ...
( لا تواسوني او تحسسوني اني انسان تشفقون عليه .. انا ثابت وبتم طول عمري ثابت اللي تعرفونه ... )
شما اخته حضنته وقالت لها انه في مليون طريقه ممكن تتفاهم معاه فيها.. بس اهم شيء يكون بخير ويقوم لهم بالسلامه ..
بعد اسبوع رجع ثابت الامارات وكانوا كل اهله معاه.. ولكن كان بداخله شيء كبير شيء اكبر من انه شوق.. قرر انه يبحث عنها .. حتى لو كان بهذي الحاله ..لانه كان في داخله يقين انه الله كتب عليه جذيه وهذا نصيبه ولابد ما الحياة تستمر ..
ثاني يوم من وصوله قرر انه يلقى ود وخاصه انها هي كانت قايله له انها تشتغل في بنك.. راح على طول هناك ولانه مايروم يتكلم ياب معاه السكرتير ماله على اساس انه يبا يفتح حساب عندهم وعلى هذا الاساس كان بيشوف ود ..
دخلوا البنك طلبوا يشوفون مدير العلاقات العامه.. بس يوم دخلوا لقوا ريال انجليزي وعرفهم بنفسه على انه مستر سميث.. تذكر ثابت انه ود قالت له انها هي كانت بس مؤقت.. كتب ثابت حق السكرتير.. انه (اساله عن موظفة اسمها ود) سال السكرتير عن ود .
كان مستر سميث مايدري انه ود ماخذه اجازة بدون مرتب.. لانه وصل من اسبوع بس ومحد قاله شيء.. بس سمع انها قدمت استقالتها وسافرت ومحد يدري متى بترجع وقال لهم هذا الكلام.. انصدم ثابت من الموضوع حس انه فقدها خلاص.. شو يسوي اللحين ..قرر انه يروح العياده ويسال هناك ..
راح صوب العماره ومعاه السكرتير .. طلب منه يتم في السياره.. وبالفعل دخل العماره.. راح صوب اللفت.. في داخله كان يتمنى يشوف ود.. اللي يوم دخل في المره اللي مضت لقاها تشوفه بنظره غيربه وكانها نظرة تعالي بس هو طنش وجودها لانه من الاساس مايهتم للبنات.. انفتح اللفت دخل .. ضغط على الدور ال 50 لانه كان يبا يكون اكبر قدر ممكن في اللفت.. حس انه يباي يحس بوجودها يسترجع صدى صوتها وكلامها.. حتى كان وده يسمع صياحها ويشوف دموعها يوم كانت خايفة يستوي به شيء.. كان وده يحس بكل لحظة بكل دقيقة قضاها مع ود.. حب المكان واللفت والعمارة اللي جمعته مع ود قرر انه من يخلص من موضوع السستر راح يشوف الشقق لانه نوى يسكن هني.. وخاصه انه مايبا يفقد اي شيء يذكره بانسانه حبها من كل قلبه وتمناها شريكه لحياته .. وصل الدور ال 50 .. يوم فتح اللفت نزل.. قال ابا اشوف شو هني.. شاف الشركه البحريه وجدامها شقه بابها مفتوح دخل عجبته فخامة الشقى واتساعها.. اقتنع بانه ياخذها.. طلع ودق على 30 يوم وصل.. لقى السستر اشر لها بيده يعني هاي.. مافهمت عليه .. نش وطلع لها دفتر صغير كان يشله حق هذي الامور .. وكتب
( مرحبا ممكن اسئل عن مريضه اسمها ود ) وعطاها الورقه تمت تطالعه اشر لها انه مايقدر يتكلم.. تفهمت وضعه وحست بالشفقه عليه فحاولت تساعده ... لقت اسم ود .. وجنبه بعد بس العمر (ود حميد 23 شكرها وطلع).. يوم يا بيطلع..قالت له ممكن اعرف اسمك.. عطاها اسمه على طول تذكرت اسمه.. فقالت له من فترة اسبوع في بنت سالت عن اسمك.. استغرب من اللي ممكن تسال عنه غير ود.. شكر السستر وطلع.. في السيارة طلب من السكرتير انه يأجر له هذي الشقة.. وطلب انه يأثثها له .. ونفذ سكرتيره كل شيء وفي غضون شهر كان كل شيء جاهز وشقته جاهزه ..ثابت خله الشقة حق الايام اللي يبا يرتاح فيها من الشغل.. يروح الشقة هذي عشان يقدر يعيش وسط احلامه وذكرياته.. في نفس هذا الاسبوع كانت ود تحاول تقنع ابوها انهم يردون الامارات ...
ود اللي قضت ايامها على السيف.. في التفكير في ثابت ونست اي شيء ممكن يهمها في الدنيا.. قررت انها تحاول تنسى .. وانه لابد ماتعيش حياتها ..